الثلاثاء، يناير 16، 2007

.اربع حكايات نسائية


(1)
جلست على مقعدها فى القطار..بعد دقائق جلس بجوارها شخص آخر.دون ان ينظر اليها.ودون ان تستدر اليه ولو لحظة..ظلت تنقر باصابع يديها على حقيبتها بصون رتيب..لم ينطقا حرف واحد.وعندما توقف القطار..ونزلت..نزل هو خلفها..فاستدارت اليه قائلة:..طلقنى
(2)
واقفة فى الشرفة..انتهيت من عد كل النجوم فى السماء مدت يدها تلتقط سيجارة..وجدت العلبة قد نفدت..نظرت الى كشك السجائر اسفل العمارة..هزت كتفيها..وفى لحظه كانت قد اتخذت القرار..كانت فى طريقها الى ارض الشارع..هاوية من الشرفة..!
(3)
على باب الشقة التى جمعتهما 7سنوات..وقفت تتابع حركة العمال وهم يحملون حقائبه و ادواته الى الخارج..تعلقت عيناها باخر حقيبة تهبط محمولة على كتف احدهم..نظرت اليه و هو يهبط الدرج خلف العمال..بدون ان تشعر وجدت نفسها تقول:ابقى اسأل عليا..تجمد فى مكانه..و دون ان يشعر كان قد انحنى على يديها يقبلها..وعادت الحقائب ثانية من حيث آتت..
(4)
انتهت من اعداد الطعام..ترتيب البيت..اشعال عود البخور الذى يحب رائحته.تعطير منامته ووضعها على السرير و بجوارها الوردة الحمراء..خرجت الى الصالة..طالعتها صورته على الحائط و شريط الحداد الاسود على جانبها..نظرت اليها لحظه..ثم حملت المقعد ووضعته فى مواجهة الباب..وككل يوم..جلست عليه تنتظر..

هناك 38 تعليقًا:

Ehab يقول...

اوووووف بجد
جامده قوي
لا تعليق خير من اي تعليق

بين الأمل و اليأس يقول...

مش عارف اقول ايه
رغم ان كل موقف او حكاية بتكون غيربة وبفضل اقول واخرتها يعني
لكن النهاية غير متوقعه
اولا توقعت ان هاينشأ حب أو شيء من هذا القبيل
ببص طلعت مراته
سبحان الله
وثانيا
تخيلت انها هاتنزل تشتري او تمتنع عن العد
لكن انتحرت
هي كانت مخنوقه اوي كدا ربنا يسترها علينا
ثالثا
ودي الاهم فعلا الحب جميل
بس تلاقيه رجع عشان مكنش هايلاقي حد يطبخله ولا يغسله ولا مكنش فيه بيت ليه اساسا
انا توقعت ان اخر واحد ده الشنطة يطلع فيها كنز ولا حاجه
رابعا
انه الايمان بالحب
دي بقه الله يكون في عونها
انا مش عارف اعبر بجد في النقطه الرابعه دي عن مدى احساسي
معقول لسه فيه حب بالشكل ده
ياه تخيلي لو فعلا لقته فتح الباب ودخل عليها
نفسي اشوف معجزة زي دي
اسلوبك جميل وجاذب للانتباه رغم ان العنوان مش بنفس قوة المحتوى
بصرااحه
وربنا يسترها

bagabigo يقول...

نور بجد خيالك و احساسك وهمى كلهم احلى من بعض بس رقم 3 لمستنى اوى
ميرسى بجد على تعليقاتك عندى

we2am يقول...

الله يحرقك و يحرق الابداع يا شيخة ايه ده؟ :D
لما قريتها عالقهوة..اتصدمت و تنحت..وقلتلك انها مختلفة و غير متوقعة..
لما قريتها تاني دلوقتي..تخيلت المشاهد بالضبط..رغم انها مشاهد قصيرة..الا انها مليئة بالاحساس و التفاصيل..اه التفاصيل محروقة التفاصيل :D :D
انا رايي اننا نبتدي نفكر في الاحتراف..عايزين نعمل ابونيه شرك عند ميريت
:D

linda يقول...

بهنيك على هيك قصص

رائعة انت لانك لمستي الحقيقة بواقع شامل

تحياتي

whyme يقول...

جميل اوى يا نور

الكلام قليل و الاحساس كبير اوى و اكثر من رائع و خصوصاً مشهد الانتحار

يدوب بيكون قرار و لحظه بتنتهى عندها حياتك ......... لحظه صعبه اوى

تحياتى و منتظر المزيد من وصفك الجميل للحظات مهمه ممكن مكناش بناخد بالنا منها

karakib يقول...

:) جامده بس أصابتني بالأكتئاب
كفايه أنتحار يا نورا الله يخليكي كفايه أنتحار
أنا عندي أمتحان بكره
مش عارف أعلق علي واحده واحده
جاي تاني ها

Mr_Karimo يقول...
أزال المؤلف هذا التعليق.
nour يقول...

ehab
يا بنى انت اى كلمه منك تكفى تعليق و لا لا تعليق كفايه نورك يا عم:)))
مبسوطة انها عجبتك

بين الامل و اليأس
النهاية الغير متوقعة مقصودة
انت اول واحد تعجبه اخر حكاية و ده علشان انت رقيق بس:)))
انا بحب تانى واحدة اوى
رأيك فى كل واحدة جامع شامل لاى حاجة ممكن اقولها شكرااا
منور يا عم

bagabigo
عيب يا بت متشكرنيش على تعليقاتىعندك المدونة بتاعتك بتلمسنى فبكتبلك
فى ناس كتير بتعجبهم تالت واحدة خصوصا البنانيت القمامير اللى زيك:)))
منورة

we2am
واضح ان كل حاجة بينا شرك يا بنتى:)))))))))))
شكلنا هنحب شرك و نتجوز شرك كمان
انا موافقة على الابونيه نضبط لما نخلس الزفت الامتحانات

linda

منورة و كل اهل ليبيا منورين
ميرسى على كلامك الشيك ده يا بنتى

why me

ايه يا عم كل الكلام الجامد ده ليا....مش عارفة اقولك ايه تانى حكاية اكتر حكايه انا برتاح فيها و بحبها مع ان هانى نفسه يضربنى عليها بس انا بحبها برضه:))))
منووور

mr.karimo

انا مش هرد على كلامك الغريب بس هى كلمه واحدة
وجودك غير مقبول على المدونه دى

غير معرف يقول...

Hello Nora,

After some while I thought it was time to write here something ;-)
I am back from vacation but I looked on this site already sometimes, and now I thought it was time to write something here. Hope to talk with you soon.

Be God's,

Theo

shaimaa يقول...

gmeel gdn..homa el 4 stories 7lween ..bs 2ktr 2tneen lmsony el tlta w elrb3a
ama el2ola fa surprised me & the second 1 hags b7'f mno
b7eeky

frozen love يقول...

افكار رائعة

.بدون ان تشعر وجدت نفسها تقول:ابقى اسأل عليا..تجمد فى مكانه..و دون ان يشعر كان قد انحنى على يديها يقبلها..وعادت الحقائب ثانية من حيث آتت

الجزء ده بجد فوق الرائع متعرفيش انا حسيته قد ايه رغم اختصاره..اللي متكتبتش وصلني

تحياتي

mansourawy يقول...

دى تعتبر قصص قصيرة
مش عارف
بس لو كلها بيحمعها عنصر التشويق لقرايتها للاخر

بخصوص الاولى رتابة حياة زوجية وخصام فطلبت فراق
بخصوص التانية
شكل اخر سيجارة فيها بنجو فوقعت ع طووووول
التالته
صورة جميلة فعلا لحنين على باب افتراق
الرابعة
مشاعر فياضة فالموت ان كان فراقا
فحياتها الان ذكرى له

تشكرى ع البوست

أخف دم يقول...

روعة يا نور بجد .. أنا تخصصى شعر بس انما فعلا القصص القصيرة دى جامدة جدا جدا ..والتكثيف فيها عالى جدا واستخدام المفردات البسيطة..ده كله رائع .. ربنا يوفقك.

هيثم ابوعقرب يقول...

اجمل حاجه فكل قصه من دول
هيا النهايات غير المتوقعه
بجد تحفه

---
1
الاولي تظهر رومانسيه ف السطر الاول
ومع الوصول لقمه الحيره في السطر قبل الاخير
ياتي الحل
طلقني
فعلا وصفتي الانفعال بكل مراحله البرو الذي يسبق العاصفه
---
2
لولا ان حاله الاكئاب لم توصف جيدا او وصفتيها باختصار
لما كانت للنهايه مذاق
اعتقد ان البطله ف خيالك
سئمت من هذا المشهد الذي تكرره كل ليليه
فقررت التخلص منه نهائيا
بسيطه وجاده جدا
---
3
و دون ان يشعر كان قد انحنى على يديها يقبلها

فعلا الحب مبيهونش
مش العشره
ع العموم تعتبر اضعف واحده ف الحكايات الاربعه
رغم سمو هدفها
---
4
اشعال عود البخور الذى يحب رائحته

الجمله دي فيها عمق كبير لمعني الوفاء
لازالت تذكر حتي عود البخور
وتنتظر
بما ان المعني ف بطن الشاعر
هل تعتقدي انها سنتظر الي متي

اعتقد ان القصه الثانيه
هي الحاله المتاخره لهذه المرأه

----
5
----
جميل قوي شاعره وقصاصه ممتازه في نفس الوقت

قصاقيص يقول...

أكتر من رائع
زاوية تانيه خالص بصيتي منها وكتبتي
فعلا انا اتجمدت قدام البوست ده
GO ON...

karakib يقول...

نوررررررررررا
خلصت الأمتحان النهار ده و جيت أقرا بمزاج بقي
حلوين أوي بس أنا بخاف من فكرة الأنتحار في كتاباتك .. عارف أنك متأثره بألبير كامي بس مش عارف ليه كده بأتوجس ريبة من الأفكار دي حلوه بأتوجس ريبة
أنما من ناحية الاستمتاع اثناء القراءة و قدرتك علي جذب القاريء حتي النهايه فيحدث بالفعل يا فندم

أحمد يكتب كما لم يكتب من قبل يقول...

النهايات سودواية..
ده أداء مازوخي في الكتابة؟
ولا دي رؤيتك؟
ولا الابداع معاك طالب نكد اليومين دول؟

OMA يقول...

جامدييين اوي

كل فكره فيهم جامده

وخصوصاً بجد التالته...خلاص انا قلت الفراق والوداع والضياع
وفي ثانيه وبكلمه واحده منها يرجع
بجد روعه الحب دي بتجنني...نفسي الاقي ناس كده بجد

وكمان الموقف الرابع ده...بقيت احس مش فيه حد كده في الدنيا..لابصراحه هو فيه لكن نادرين جدااا...هو ده الحب الحقيقي والصادق بجد..انك تحبي من غير مقابل ومش لازم اللي بتحبيه يكون معاكي..انتي بتحبيه لمجرد الحب

احييكي بجد ياجميله على الافكار

nour يقول...

theo
every time i see ur name writing me a comment i can`t stop smiling and feeling thet u r really my best friend..my happiness will complet when i wite an english post just for u honet
Be GOD`S AND LOVE U
NORA

nour يقول...

shimaa
ربنا يخليكى يا ستى التالته و الرابعه اللى عجبوجى مع ان فى كتير مش حابين التالته بس لاحظت ان كلهم ولاد انما البنات بيحبوها..هما الولاد كده مش بيعجبهم العجب:))))
لا بس مبسوطه انهم عجبوكى يا ستى
منوووورة

frozen love

لا فى رجالة عجبها التالته انا كنت غلطانه بقى بعتذر للولاد
:)))
و الله رأيك يا حامد شهادة تقدير علشان انا بعتز بيه اوى
منووووور

mansourawy
هى مش قصص قصيرة هى زى حكاية قصيرة كده:)))
تحليلك جامد يا معلم منووووور

اخف دم
:)))
شقت بقى اخيرا حاجة عجبتك ده فخر ليا يا معلم و الله منوور بس ما تسجدنيش انا برضه مستنيالك على بوست علشان اوريك:))))))

هيثم ابو عقرب المعلم يا جماعه
و الله تحليلك شامل كامل مانع جامع:)))
شفت التالته معجبتجش طب نستقر على حاجة بقى:))))))))))
منووور دائمااا

قصاقيص
ازيك منووورة
اتجمدتى قدام البوست دى كلمه جامدة اوى:)))
ربنا يخليكى ياستى
هاااااااااااااانى
و نبى زغرودة لهانى انه خلص امتحانات يا جماعه مبروووك يا معلم
اه ما انا عارفه انك بتتوجس خيفة من فكرة الانتحار بس انا بقولك يا بنى اهو ما تقلقش مش هينفع انتحر من غير ما اشوفك انا قاعدة على قلبك ما تقلقش:)))
المتألق احمد الدرينى
لا هو النكد مش طالب معايا اليومين دول بس:)))
انا اصلا كتبت البوست ده من زمان بس نزلته تانى دلوقت لان مودى نكد فعلا اليومين دول زى ماكنت لما كتبته بالضبط:))
بس ده النكد الجميل عارف النكد الجميل بحب انا الحالة دى:)))

oma
يبقى اغلبيه يا جماعه البنانيت القمامير بيحبوا التالته فعلا
و الله انا شكلى يا اوما هنزل بوست كنت كتبته زمان بتاع ثلاثه اوجه للرجل علشان اشوف بقى الولاد هيقولوا ايه:)))
مبسوطة انها عجبتك يا اوما الجميلة ومنووورة دائماا

sofinqoraso يقول...

بجد يجننوا يا نور
كل قصة بتاخدك لموقف تانى ومشاعر واحاسيس تانية
الأولى
تغير المشاعر والأحاسيس والمواقف فى الحياة اللى ممكن تهدم حب كبير
حسيت أنهم اول مرة قابلوا بعض كانوا فى القطر ده
مع العكس تماماً من اللى حصل
وانهم وهما نازلين قالها تتجوزينى

التانية
بجد نهاية رائعة
مش رائع انها انتحرت بس مفاجأة
محدش خد باله انها وصلت لحالة دى من اليأس

التالتة
رومانسية لأقصى الحدود
ساعات التسامح بيكون ابسط واسهل الحلول ومع ذلك بنرفضه
أو بنعمل نفسنا مش شايفينه

الرابعة
بتقولك يعنى ايه وفاء

بجد بحييكى لأنك لمستينى بكل كلمة كتبتيها
وإلى الأمام دايماً

elkamhawi يقول...

مش عارف ليه مصمم اربط الحوارات كلها ببعض مع انها مش هتمشى بس يمكن بس بجد قنبلوة

Amr Ahmed يقول...

الفنون جنون

يعني لو كانت النهايات طبيعية زي مثلا الحكاية الاولي كانوا حبوا بعض لو كانوا مايعرفوش بعض

كان هاتبقي عادية

لكن الاختلاف يجلب التميز

بجد راااااااااائعة جداجدا

ايه الموهبة دي
تحياتي

3ASEF يقول...

اسقيني ابداع كمان وكمان يا نوره :)))
الاولى هدوء ما يسبق العاصفة !! معقول طلعت مرته؟! عجب !
----------------
التانية عندما يصبح الانتحار الخيار الأمثل .. ساعات التفكير عند الانسان بعمل حالة هستيرية واحساس بان دماغك حتنفجر! بترافقها حالة من الاكتئاب الي بتخلينا نفكر مليون مرة بالانتحار .. روعة كفقرة للقراءة مش للتطبيق والا حيتفسر بان سبب الانتحار انها كسولة مش قادرة تنزل تشتري من تحت سجاير هههه
----------------
التالته ما اجمل السماح بين العشاق في اللحظة الي بنعتقد انها نهاية المطاف !
بس بصراحة ما عجبتني كلمه انحنى على يديها يقبلها ! حسيت بالمهانة ! لو اخذها بالحضن اوكيه
P:
ممكن تقولي عني بمثل عنوان رجل هههه ع فكرة ما تتوقعي هيك موقع يصير من رجل لان بطبع الرجل عقلاني وليس عاطفي
(;
---------------
الرابعة قمة الوفاء !!
هاي اكثر وحدة عجبتني (((:

Mony The Angel يقول...

eh da hwa ana ma commentetsh :s
wallahy ana geet hna mn zamana awe, w fakra eny commenteet :(
yalla msh mohem, a comment mn taany :)
awel wa7da sadma awee 3ala fekra, ya3ny msh motwaqa3a abadam\n
tany wahda gamda gamda ya3ny ;)
talet wahda b2a helwa awee enhom reg3oo taan leba3d :)
rabe3 wahda b2a, No comment..
bgad malhaash 7al, aktar wa7da assaret fia awee..
pravo ya nour (f)

مُزمُز يقول...

أفكار بسيطة وذكية
بس خلقتيها حلو أوي في كلمات عذبة جدا

الثالثة والرابعة مليانين رقة وحنين وتفاصيل بسيطة مؤثرة

بس الرابعة افتقدت لعنصر المفجأة الموجود في التلاتة الأولانيين كمان التالتة كانت أطول من المطلوب في رأيي بس كانت رقيقة وعموما أقوى ما فيها هو الجملة الختامية لها
وعادت الحقائب من حيث أتت

أما الأولى فهي الأذكى والأعمق في فكرتها
ولكن الثانية صيفت بأفضل منها وكانت المفارقة الصادمة حين يتصور المتلقي أنها ذهبت لإحضار السجائر ليكتشف أنها سئمت فذهبت بطريقة أسرع

nour يقول...

sofinqoraso
على فكرة اسمك بعمله كوبى باست:)))
و الله التليل للحكايات اللى كل واحد كاتبه اجمد من انى اقول اى حاجة:))
اول تعليق عجبنى ممكن فعلا يكونوا اتقابلوا فى القطر..صح:))
و مش هقول حاجة على الكلام الجامد اللى قولتيه ده:))))))))))
elkamhawi
ايوة على فكرة تمشى انهم مرتبطين ببعض يعنى ترتيبهم يبقى كده:اول واحدة بعدين التالته و بعدين الرابعه و اخيرا التانية
تمشى يا معلم
بس انا شايفه انهم ميبقوش مرتبطين ببعض احسن يعنى الشخصية بتاعة كل سيدة مختلفه الاولى معتقدش انها ممكن تنتحر اللى توقف جوزها فى الشارع علشان تقولة بكل صراحة طلقنى مينفعش ترجعله و مينفعش تنتحر البنت اللى فى تانى حكايه بقى ضعيفة و مجنونه مينفعش تكون نفس الست اللى وقفت كده قدام جوزها و لا اللى لسه مخلصه ليه بعض ما يموت بحس انها عندها مثلا تمانية وعشرين سنه التالته فى التلاتينات بقى ست عادية مصرية مش قادرة يهون عليها العشرة غير اول واحدة خالص الرابعه فى العشرينات برضه و ارق واحدة مش ممكن تنتحر و لا تطلب الطلاق فهمتنى؟؟

nour يقول...

amr ahmed

بالضبط الاختلاف فى النهايات الصادمه اللى انا متعمدها اصلا ربنا يخليك يا عم على الكلام الجامد ده :))))
منووووور دائما

mony the angel
ده علشان انت رقيقه بس ملاك يعنى..انا و الله مبسوطة اوى بتحليل كل واحد للحكايات جامد يعنىى
منوورة يا بنتى

مزمز

نفس الكلام كمان التحليل بتاع كل حكاية عاجبنى اوى و انا مش قد الكلام الجامد ده:)))))))))
مش عارفه اقول ايه مبسوطة انها عجبتك:)))))


3aseeeeeeeeef
الرابعة عجبتك علشان انت رقيق بس:)))
فى التالته انا متعمدة انه يبوس ايدها ايه المشكلة يعنى مش مراته و بيصالحها مظنش ان ده يقلل كرامته و لا حاجة:)))
التانيه انت عارف انى بحبها جدا بس مش للتطبيق العملى متخافش:))) الولى صادمه انا عارفه بس انعدام الحوار بين اتنين بيعمل كده و اكتر
تعليقك جاااامد

LAMIA MAHMOUD يقول...

لاء بجد الاربعة على اختلافهم وتنوعهم مؤلمين اوي

افكارهم اكتر من تحفة وانتي هايلة بجد

بس اكتر حاجة عجبتني ويمكن صدمتني بتاعت السجاير

هما قالوا صحصح التدخين يسبب الوفاة بس مش كده

جامد يا معلمة

Feras othman يقول...

على باب الشقة التى جمعتهما 7سنوات..وقفت تتابع حركة العمال وهم يحملون حقائبه و ادواته الى الخارج..تعلقت عيناها باخر حقيبة تهبط محمولة على كتف احدهم..نظرت اليه و هو يهبط الدرج خلف العمال..بدون ان تشعر وجدت نفسها تقول:ابقى اسأل عليا..تجمد فى مكانه..و دون ان يشعر كان قد انحنى على يديها يقبلها..وعادت الحقائب ثانية من حيث آتت

**********
أنت لم تسمعي يوماً أنيني يخرج من جوفي وتحبسه كفي عبثاً حتى لا يفضحني الحنين...............
أنت ما يوماً جابهتني لحظة غضب أو ثوران ودافعتي عن حبي لحظة ما كنت أجمع أمتعتي لأمضي وأعطيتني الفرصة حتى أدافع عن رأيي وثوابتي وحقوقي كمحب أو انسان.أو حاولتي معي أن أبقى
أنت لــم تـر ذاك الإحســـــــــاس .. الطفل في داخلي الذي يبكي حتى الموت طالباً صــدر الحنـــــــان

هيثم ابوعقرب يقول...

يظهر اني هطقرطس تاني
وبدال م بدخل اشوف حاجه
بقوا 4 حاجات جامدين جدا


ابشري ممكن يتحول اعجابي لادمان
ها هتبيعي ولا هتسبيني متعذب

غير معرف يقول...

again there is this english language between all this arab, I'm sorry I don't understand that, but still it's nice to come close to the work of a friend, even though I don't understand it, I can see she is working on this site, and that shows live is going on. After all the languages I have to learn, and the finnish one is now the most important one ;-) I wish I would learn to understand this, but I guess it won't happen that fast.

Be God's,

Theo

nour يقول...

لميا محمود
:)))))))))
يا بنتى المفروض ياخدوا الحكايه دى فى حملة ضد التدخين و الله
ربنا يخليكى على كلامك يا معلمه
منووووووورة


feraaaaas othman
طب اقولك ايه ما انت قلت كل الكلام لا بجد كلماتك رائعة انت عارف رأيى و حسيت انها فعلا مكملة للحكايه وجهة النظر الاخرى
منوووووور دائما يا فراس

هيثم ابو عقرب المعلم..
:)))
يا معلم ده ادمان جااامد
خليك مدمن
و مفيش قرطسة و لا حاجة
:))))

nour يقول...

dear theo,
i`ll write a post in english just for u,cause it`s really important to me that u could read my writings ,so proud of ur friendship that make u visit this site just because u care,u know what is that mean to me.
theo...thanks
Be God`s
and love u

dead man يقول...

ظلت تنقر باصابع يديها على حقيبتها بصون رتيب.. نظرت الى كشك السجائر اسفل العمارة..هزت كتفيها..وفى لحظه كانت قد اتخذت القرار.. كانت فى طريقها الى ارض الشارع.. ثم حملت المقعد ووضعته فى مواجهة الباب..وككل يوم..جلست عليه تنتظر

دينا فهمي يقول...

ايه الجمال ده؟؟؟
اخر اتنين تعبولي اعصابي (:

maha يقول...

سلام عليكي
دي اول مرة اكتبلك و ازور مدونك و هي بحق رائعة
الاربع قصص في منتهي الرقة
اي نعم اتصدمت في اول 3 و لكن الرابعة هي من اسكنت في نفسي الألم
كم احب الوفاء في الحب
ليت اهله لايزالون بيننا

سلام
مها

Related Posts Plugin for WordPress, Blogger...