السبت، مايو 17، 2008

سلسلة النكبة -3


كان دايما السؤال اللى بيتسألى لما حد يجيلى البيت و يدخل اودتى..ايه العلبه اللى فيها رمل دى؟؟؟

العلبة الزرقاء اللى فيها رمل اللى بتحتل موقع دائم عندى مش اى علبه و مش اى رمل

ده رمل فلسطين

كان عاصف صديقى فى فلسطين و قالى اجيبلك ايه معايا

كان نفسى اقوله هاتلى فلسطين كلها معاك

هاتلى زتونها و ترابها و حمامها و كنايسها و جوامعها

هاتلى القدس و قبة الصخرة و بيت لحم و رام الله

هاتلى حجارتها و ناسها و حزنها و معانتها

هاتلى اى حاجة فيها ريحه منها

قلتله يومها هاتلى رملها ترابها اللى نفسى امشى عليه ..اللى عمرى ما مشيت عليه..اللى همشى عليه فى يوم اكيد

بس اشم ريحته عايزة اشم ريحته

و لما جه عاصف جابلى معاه رمل فلسطينى

و جابلى اكل فلسطينى مناقيش و مكدوس غرقان زيت زيتون من اللى هو اسمه فعلا زيت زيتون..مش زيت التموين اللى بيقولوا عليه زيت زيتون اللى موجود هنا

و لما شميت ريحة رمل فلسطين اللى سبحان الله مختلف

حسيت انى بحب البلد دى اوى

حسيت انها وطنى فعلا

زيها زى مصر اللى بحبها اوى برضه رغم كل شىء

كانت فكرة انى ماسكه رمل من فلسطين مبهجة كأنى زرتها فعلا

يااااااااااااااااااه لو كل واحد ياخد شويه رمل من فلسطين لحد ما ناخدها كلها

فجأة يلاقوا الصهاينه نفسهم فى العدم مفيش ارض من تحتهم

ستين سنة و فلسطين مسلوبة

ستين سنة ..ناس ماتت و اتولدت و اتربت على نفس الفكرة

فلسطين المقدسة

التابو العربى

الندبة اللى ممكن نتظاهر اننا مش فاكرينها عشان نقدر نعيش

ستين سنة ..و الواحد ميعرفش عمره قد ايه

بس عارفه و متأكده انى برضه هزورك يا فلسطين

هشوفك و هتنفسك

و همشى على رملك الحقيقى مش شوية رمل فى علبة زرقاء

Nour

هناك 9 تعليقات:

AHMED SAMIR يقول...

ياريت الفلسطينيين يحبوا مصر زي مانتي بتحبي فلسطين
المصيبة ان الفلسطينيين بياخدوا المصريين بذنب حكومتهم
تحياتي

3aSef يقول...

:))))))))))
صديقتي العزيزة نوووور
لو كل الناس متلك كان زمان رجعت البلاد لو كل العرب مقتنعين بالفعل انو احنا كلنا العرب وما في فرق بين مصري وفلسطيني ولبناني وعراقي واردني وسوري ووو وبتعاملو ع هال الاساس وبهتمو لهموم بعض ما كان وصلنا للي احنا فيه من التفرقه والتقسيم والكره الي بين العرب نفسهم
انتي بتحبي فلسطين يا نور
وانا بحب مصر
بس مش كل العرب هيك
----------------------------
بس عارفه و متأكده انى برضه هزورك يا فلسطين
هشوفك و هتنفسك

و همشى على رملك الحقيقى مش شوية رمل فى علبة زرقاء
----------------------------
ان شاء الله يارب بيجي اليوم الي بتحرر فيه بلدنا كلنا فلسـطين والعـراق
وتخلص المشاكل في لبنـان
ونرجع وطن عربي واحد
حلم عربي واحد
تعرفي يا نورا
لما طلبتي مني الرمل
ما بتعرفي حجم السعادة الي غمرتني
لربما من هول المفاجأة
وكنت بتمنى اني ما اجيب شي من فلسطين
بل انتي تيجي وتشوفيها
متل ما انا باجي هون
وبشوف مصر
وبوقف قدام نيلها
وبتمشى ع كورنيشها

Mr_Karimo يقول...

ومن من لا يحب فلسطين ... اولى القبلتين وثالث الحرمين والناجية من دخول المسيخ الدجال مع مكة والمدينة ... احبك يا فلسطين فانتي ارض المسلمين .. عربي , اوربي , افريقي مهما كنت فانا مسلم وامنك جزء من عقيدتي

"علبة نور الزرقاء" تصف الوضع الراهن فمع تدهور حالنا سنجد نور تانية معاها علبة "صفراء " فيها تراب العراق .... ويارب تنفك عقدة لبنان قبل ما تظهر علبة "بيضاء" منقوش عليها شجرة الارز ... ولو استمر الحال فلن يجد ابناءنا الا بعض علب ملونة هي ارثهم المكتسب من خلافتنا وتشتتنا ..... اللهم ابطل ظني وخوفي

ذو النون المصري يقول...

لا اعتقد انه يوجد من العرب من لا يحب فلسطين
اعتقد ان لو لم يوجد سبب لهذا الحب سوي انها ثالث الحرمين و اولي القبلتين لكان كافيا
هناك سبب اخر و هو التعاطف الواجب مع التضال القوي للشعب الفلسطيني و الذي من خلاله نجد ان للحياة معني ممكن نضحي من اجله
تحياتي لعاصف و كل اهلنا في فلسطين

Oma يقول...

ya ba5tk beraml falstine elly 3ndk ya noooor
isa hayegy el yom elly temshy 3aleh ya rab isaaaa
el post gmel awyy awyy ya nooooor :))

آيــة يقول...

[صراحة ..
أنا واحدة من الناس اللي لمدة طويلة .. كنت بعتبر قضية فلسطين .. مسألة شخصية .. لقربها مني و لما تشغله من ذهني و اهتماماتي ..
لا اخفي ان ده اتغير بدرجة كبيرة ..
مش عارفة عشان الوقت بينسينا ..
و لا لان الحياة زحمة جدا ..
على كل الأحوال ..
تدويناتك الأخيرة أثارت في شجن مكتوم .. من سنوات و أيقظت لدي ذكريات هااااااااامة ..

تحياتي

سارة يقول...

مدونة حلوةةةة

خيرالدين يقول...

رغم مرور الستين عام ورغم اننا ولدنا وهذا الوقع المؤلم يفرض نفسه
الا ان الحلم باقى فى نفوسنا
ونحن متأكدين ان اخوتنا فى فلسطين مدركين للفارق بين مصر الشعب المحب لهم وبين النظام الخائن والعميل


مدونتك رائعه

محمد العدوي يقول...

دأبو في الفترة الاخيرة على حصر القضية الفلسطينية في فلسطين وأهلها ..


ودي اكبر الجرايم في حق هذا المكان ..


لكن مادامت تسكن نفوس ناس زيك . بعد ستين سنة .. يعني تسكن نفس واحدة بعد جيلين كاملين من النكبة ..

مش ممكن فيما اظن ان تنسى ..

Related Posts Plugin for WordPress, Blogger...