الأربعاء، نوفمبر 15، 2006

محمد عفيفى..الساخر الأعظم


من افضال والدى العزيز عليا انه ورثنى عادة سيئة بالنسبة لاصحابى و هى عادة التتنيح و الثبات امام اى رصيف عليه كتب ان شالله كتب سلاح التلميذ الشىء اللى بيخلى اصحابى يشدونى من قدام الرصيف و رقبتى تفضل ملووحة عليه..هو ده كان السيناريو اللى حصل امبارح و انا ماشية مع داليا صاحبتى فى احد شوارع المحروسة برضه كالمعتاد وقفت قدام رصيف و كالمعتاد استعدت داليا انها تشدنى عندما..صرخت فجأة ايه ده؟و قربت من كومة الكتب على الرصيف علشان اتأكد..ده هو فعلا..و بسرعة مسكت الكتاب و جريت على البياع النوبى المبتسم بكام ده يا عم..أجاب بحذر و استعداد للفصال معايا زى ما بيحصل دايما مع الزباين.أتنين جنية..كان ممكن افاصل معاه و آخد الكتاب بنص جنية..بس مقدرتش..الاسم اللى مكتوب على الكتاب كان بالنسبة لى اسم لا يمكن الفصال عليه.. لوكان قال اى مبلغ اعلى من كده بكتير كنت هدفعله برضه بذات الصمت اللى خلى البياع يستغرب و يندم انه مطلبش اكتر..الاسم اللى اى كلمة من اللى هكتبها عليه متكفيش..اسم ..محمد عفيفى
هذا الكاتب الجميل رحمة الله عليه..الساخر بسلاسة..الراقى ببساطه..اللى ممكن ينتزع منك ضحكة بسهولة و دمعة بسهولة ايضا..هذا الاسم الذى لا يمكن الفصال عليه
و هكذا كنت فى الطريق بيتنا وفى شنطتى كتاب:ترانيم فى ظل تمارا..هذا الكتاب اللى فضلت زمن ادور عليه و لم اجده و لما بطلت ادور عليه..وجدته..و كأن العثور على كتاب لمحمد عفيفى لابد و ان يحمل فى ثناياه جزء من سخرية هذا الكاتب العظيم
كالعادة كان اللى عرفنى على محمد عفيفى هو استاذنا الرائع..الاجدع من ستيفن كنج ... ديستوفسكى مصر..د.احمد خالد توفيق فى رواية من اجمل رواياته فى سلسلة فانتازيا(فلاسفة فى حسائى)لأبدأ حكاية عشقية مع كتابات محمد عفيفى رحمه الله..ترانيم فى ظل تمارا هى آخر ما كتب محمد عفيفى قبل وفاته..بغلاف لحلمى التونى متصمم ببساطة و كأنها رسومات طفل ليؤكد بساطة و جمال مؤلف الكتاب..كتاب يأخذك معاه لتفاصيل حياة ساخرنا العظيم..ليدعوك لكوب عصير ليمون معاه فى حديقته علشان يعرفك على زهيرة و تمارا و رينا أشجاره اللى مسميهم و بيكلمهم و على مونى القطة بتاعته و على فيدو كلب الحارس و على فروشة الفراشة البيضاء اللى بتقف على حوض الورد كل صباح و اللى بيفترض كل يوم انها هى نفس الفراشة..و على ضفدوع لو كان ذكر ضفدوعة لو كانت مؤنث اللى بيقفز مارا بحديقته كل يوم ليتبادلا حوار بليغ جدا هو:آووو
آووو
على آمينة زوجته اللى تجاوزت الستين و لسه بيحبها..على ابراهيم ابنه الشهيد..وحماده ابنه المهاجر..و فى نهاية الترانيم الممتعة يخليك تبكىلما مونى القطة تموت بعد ما كان بيتعامل معاها كفرد من العيلة بسنوات عمرها العشرين اللى تماثل سنوات عمر ابنه المهاجر و تحمل ذكرياتهما المشتركة اللى ماتت فى نفس وقت قطع شجرته رينا..فى نفس وقت تعب زوجته و سفرها لابنهما..فى نفس وقت انهيار الكرسى القش الاصفر اللى كان بيقعد عليه تحت ظل تمارا و كأن ذهاب شىء واحد جميل فى حياته كافى لذهاب كل شىء
ترانيم فى ظل تمارا..اقرأوا هذا الكتاب..دوروا عليه فى دار نشر الشروق ..و لو لقيتوه على اى رصيف ارجو انكوا تشتروه لأن كتاب زى ده ميستهلش الرصيف ابدا.. و لو ملقتهوش سيبوه هو يدور عليكوا و أكيد هيلاقيكوا زى ما لقانى
لتقريب صورة الاستاذ محمد عفيفى هذه هى وصيته اللى كتبه بنفسه قبل موته نقلا عن موقع ديوان العرب للاستاذ احمد كمال الوكيل
" عزيزى القارئ : يؤسفنى أن أخطرك بشىء قد يحزنك بعض الشىء وذلك بأننى قد توفيت ، وأنا طبعا لا أكتب هذه الكلمة بعد الوفاة (دى صعبة شوية) وإنما اكتبها قبل ذلك ، وأوصيت بأن تنشر بعد وفاتى ، وذلك لإعتقادى بأن الموت شىء خاص لا يستدعى ازعاج الآخرين بإرسال التلغرافات والتزاحم حول مسجد عمر مكرم حيث تقام عادة ليالى العزاء .
وإذا أحزنتك هذه الكلمات ، فلا مانع من أن تحزن بعض الشىء ، ولكن أرجو ألا تحزن كثيرا . "

و هذه هىاعماله:
أنوار (مجموعة قصصية) ـ التفاحة والجمجمة (مسرحية) ـ بنت اسمها مرمر (قصة) ـ فانتازيا فرعونية (رحلات) ـ شلة الحرافيش (قصة) ـ سكة سفر (رحلات) ـ وسلاسل مقالاته (ابتسم من فضلك) ، (ابتسم للدنيا) ، (ضحكات عابسة) ، (ضحكات صارخة) ، (للكبار فقط) ..
طبعا بالأضافه لأبداعه الأخير ترانيم فى ظل تمارا
الله يرحمك يا استاذنا العزيز

هناك 16 تعليقًا:

غير معرف يقول...

كتابتك جميله جدا يا نور وشكر ا للفت انتبهنا لهذا الكاتب

karakib يقول...

يا رايقه :) علشان كده باقول عليكي فنانه و جواكي الابداع كتير
حقيقي هذه البقع المنيره او الكنوز الملقاه علي الارصفه لا يعرف ان يعطيها حق قدرها الا فنانه مثلك او بائع نايات متجول او تاجر الماظ و جواهر نادره
جامده يا نور
هاني

3aSeF يقول...

نور مش ححكي كتير هلأ بس حقلك بدي الكتاااااب تبع محمد عفيفي شوقتيني اعرف مين هال الشخص!!!
المرة الجاية بتجيبيه معك ههههه عندك اسلوب بجذب الآخرين مش طبيعي بعد ما قريت كلامك صرت متشوق اقرأ هال الكتاب مع اني مش متعود اقرأ لناس ما بعرفهم بهال الاندفاع!
:D

غير معرف يقول...

بلوج جميل جدا

باسم شرف يقول...

مدونة حلوة وحقيقية

حلو اسلوبك .. عايزين بزيادة للاستمتاع

nour يقول...

فى الاول كده قبل ما ارد عايزة اقول انى مبسوطة جدا بكلامكوا كلكوا و الكلام اللى اتقالى لايف من غير تعليقات يعنى..مع انى لسه واصلة من القاهرة حالا و كنت راكبة ميكروباص و ما أدراك ما الميكروباص فى ظل هيئة السكة الحديد المجيدة بس مبسوطة برضه
saikoman
انا معجبة بأسمك حلو أوى و شكرا ليك انت على كلامك الجميل
karakib العزييييييز
ما انت عارف اللى فيها يا هانى لازم اكون رايقة:))
تسلملى يا هانى
3aseeeeeeeef
الكتاب هيكون عندك الاسبوع الجاى ده انت خيرك مغرقنى
يا جماعة انا بستولى على كتب عاصف من قبل حتى ما هو يقراها..افترا بعيد عنكم
عبد الله احمد
ده انت اللى فنان جميل و ده شرف ليا اصلا انك تزور البلوج ده

باسم شرف
لنهاردة يوم عيد يا جماعة عرفتوا ليه انا مبسوطة..باسم شرف ده من الناس القليلة اللى انا بحترمها من غير ما اشوفها..
و الله عايزة بزيادة انا كمان بس الكلية بعيد عنك:)

makhlouf يقول...

نور
كتابتك جميله اوى
الرصيف مش للنوم وبس

we2am يقول...

gamd awe el7rka deh..ana ba3sha2 m7mad 3fefe..esh6a ya3ni..
dah 3'er b2a A.KH.TAWFEQ
ana 7aslly nafs el mwqefmn yomen kida..kont merw7a w la2et el mganen bta3 destewfeski nafso molqa kida 3la qar3et eltare2!!!
tab3an ana kont merw7a ba6n6tt :D
esh6a 3eleke ya bnte..btefhamy :)

nour يقول...

مخلووووف
متشرفين بزيارتك يامعلم..
وئاااام
:)ديستوفسكى على قارعة الطريق ينفع اسم رواية

غير معرف يقول...

نورا صاحبتى العزيزه او توأمى الثالث اصل احنا تلات توائم طبعا يا حبيبتى انتى متألقه دائما بس خليكى فاكره ان الراجل النوبى قال فى الاول على الكتاب
اتنين جنيه ونص وبعدين خاف من شكللك المنبهر والمندهش والمأخوذ بالإعجاب وحاجات كده كتير وغريبه بس انا اتعودت عليهابس على فكره هى دى انتى بجد بس من غير السيجاره
اختك وحبيبتك وصديقة الجنان الدائم
ستك داليا

nour يقول...

مش ممكن.........
انت لحقتى يا دوللى تروحى و تكتبى ده انا لسه سيباكى هاهاهاهاها
يا جماعة داليا دى توأمى هى و نهال فى الكلية لازم نكون احنا التلاتة مع بعض
و السيجارة بقولك عليها ايه دايما لازم تكون موجودة ليها جانب درامى جميييل
هموت من الفرحة بتعليقك

غير معرف يقول...

i read about this book
and also about the mohmed afify
i like alot what he write and relly this book i was going to cry :)
i also have your weak about the books , and when i was small i buy sala7 jahin book with 3 poundes ma3 eno kan maktoob 3alieha one only
but i see that there is some books you can't stop buying them if it was 1000000 pound
wala eah?

nour يقول...

طبعا عندك حق انا فاهمة كل الشعور ده و مبسوطة ان حد بيشاركنى فيه انا جربت ادخل على البلوج بتاعك بس معرفتش اسيب تعليق ايه الحكاية

sabrina يقول...

تحليل جميل ورائع
وفعلأزي ماقولتي الكتاب هو اللي بيلأقينا بعد ما نكون زهقنا من اننا نلأقية
big kiss for you for this beauitful post!!!!!

أحمد أشرف يقول...

أن أجد شخصًا لم يبلغ العشرين بعد ويهتم ويحب د . أحمد خالد توفيق .. ويقرأ أعماله لما وراء التسلية .. هذا شيء نادر ..

أما أن يصل الأمر إلى العظيم ( محمد عفيفي ) رحمه الله .. فهذا يدل أننا أمام حالة استثنائية بمعنى الكلمة ..

حالة غربية .. تستدعي أن أترك ردًا للمرة الأولى على مدونة ..

بالمناسبة أنا وصلت هنا عن طريق إني كتبت ( أحمد خالد توفيق ) في جوجل ..

طبعًا أسلوبك أكثر من رائع .. ولكنه لا يكفي لوصف عظمة ( محمد عفيفي ) .. محمد عفيفي التفاحة وليس محمد عفيفي مطر ..

تعرفت عليه عن طريق أستاذنا أحمد خالد توفيق .. ويوم أن قررت البحث عن كتبه .. فشلت بجدارة ..

وبالوصول إلى سور الأزبكية .. حصلت بصعوبة على القليل منها ..

للكبار فقط .. ترانيم في ظل تمارا .. بنت اسمها مرمر .. ( فيها مجموعة قصص قصيرة بعد القصة .. واحدة منهم عن الملل والتفاح اللي في الدولاب كنت فعلا هاموت من الضحك فيها .. تجنن ) ..

ابتسم من فضلك ..

ترانيم في ظل تمارا هو الأصعب .. أنصح أي واحد يحب يدخل عالم العظيم محمد عفيفي .. أنصحه ميبدأش بترانيم على ظل تمارا .. لأنه عبارة عن واحد ميت بيكتب .. كان بيكبه وهو متخيل إن وفاته قريبة .. وعمال يكلم كل شيء من حوله .. أسلوب الكتاب ده فلسفي وراقي جدًا ..

* * *

طبعًا من أروع ما كتب ..

إذا أنت اتخذت من الضرب المستمر لأولادك أسلوبًا في التربية .. فأنت في حاجة ماسة إليه ..

لا يضايقني أن أرى رجلاً دخله أكبر من دخلي .. ولكن يضايقني أن أرى رجلاً دخله أكبر من دخله ..

تلك الأزمة غير المبررة حقًا في اللحوم .. ترى هل ترجع حقًا إلى قلة المواشي ، أم كثرتها ..

أستطيع أن أجزم أن معظم الناس سوف يدخلون الجنة ، فدخول جهنم صار أغلى بكثير مما يطيقه الرجل العادي ..

سر على الأرض هونًا ، فقد عاشت هذه الأرض بدونك ملايين السنين .. وأغلب الظن أنها سوف تفعل ذلك مرة أخرى ..

الانحلال الذي في الشرق لا يقل كثيرًا عن الانحلال الذي في الغرب ، كل ما هناك هو الفارق في درجة السرية ..

لماذا أضربك ؟ لأنك أضعف مني طبعًا ..

وكتير بصراحة .. الراجل ده فعلا مستحيل نديله حقه ..

جت على بالي مقولة للدكتور أحمد حسيت فيها بأسلوب عفيفي :

تسألني عن رأيي في الرجل .. رأيي يلخصه بيت الشعر القائل :

رأى البيت يدعى بالحرام فحجه .. ولو كان يدعى بالحلال لما حج ..

تسلم إيدك نور ..

وياريتني كنت مدون علشان أخليكي تشوفي مدونتي .. بس هاكتفي بالزيارة هنا بين وقت والتاني ..

السطور اللي فوق كتبتها خلسة من وقت المذاكرة علشان الامتحان بعد بكره ..

ادعي لي ..

سلام

nour يقول...

sabrina
قبلة مقبولة:))))
شكرا جدا و ياريت تزورينى تانى

العزيز احمد اشرف
ردك مانع جامع شامل لكل اللى انا عايزة اقوله
مبسوطة جدا بزيارتك و ياااارب تكررها تانىى

Related Posts Plugin for WordPress, Blogger...